محاورة بالشعر العامي بيني وبين مهدي بن عبار العنزي

دار بيني وبين مهدي بن عبار العنزي وهو من ربابين الشعر العامي واذاعي وكاتب سعودي 
هنا نبذة عنه :
مهدي بن عبار العنزي

محاورة شعرية بالعامية حيث كتب اول بيتين فرديت عليها فاستمر الحوار الشعري “النبطي” ورغم انني اكثر اهتماما بالفصيح الا ان الشعر العامي ايضا يستهويني واجد فيه فرصة للتعبير وايصال المشاعر والمعاني التي اريدها لمن تكون العامية اكثر وصولا إليه ،، وهذه هي الابيات بيني وبينه فضلت ان انشرها بدلا من ان تضيع باورقة الشبكات الاجتماعية 

مهدي بن عبار العنزي:
لو كل مفتي راقب الله بفتواه…
كان استقر العدل في كل ديره

ولو كل مسؤولٍ خذا الحق واعطاه…
هانت جميع المعضلات الكبيره

عصام مطير البلوي:
المشكله ماهي بهذا وبلواه …
المشكلة لاصرت مثل الفطيره

هذا يشدك من يساره ليمناه …
وهذا يعشي فيك جايع حميره!

مهدي بن عبار العنزي:
ياعصام وين المعتصم وين حلياه..
وين الرجال اهل النقا والبصيره

راحواوراع الذود ضيع معشاه…
والعشب ضاع ولا انتفع به بعيره

عصام مطير البلوي:
اسمع كلام اللي يحبك وترعاه ..
عين الإله اللي فعاله قديره 

..لو امطرت باكر وبانت خفاياه …
ماينفع المكسور حتى الجبيره!

مهدي بن عبار العنزي:
ذياب بن غانم تحيزم بشلفاه…
والسيف الاملح ماتعدى جفيره 

ياشاعرْ يكتب قصيده ونقراه…
عميد للشعر الجزيل وسفيره

عصام مطير البلوي:
عزاه للي ضيع القلب عزاه ..
انا اشهد اني في ظروفٍ خطيره 

يا مهدي العبّار ميّت بفرقاه..
انظر بعيني والايادي قصيره

مهدي بن عبار العنزي:
قيس الملوح مات ماحقق مناه…
راحت عليه الله يجيرك كسيره

وانا معك بالفعل والمال والجاه…
والعبد خلاق الخلايق نصيره

عصام مطير البلوي:
الله يزيدك يابن الاجواد تقواه..
ما ينكسر عبدٍ وسيفك تديره

باصبر الين الله يجيبه بملفاه..
يعقوب قلبي معتكف في غديره

مهدي بن عبار العنزي:
الله كريم وفضل عفوه وحسناه…
من يلتجي له من عذابه يجيره 

يعقوب من يوسف شكى حر فرقاه…
من عقب ماحطوه في وسط بيره

عصام مطير البلوي:
يغفر ذنوب اللي مفارق خطاياه..
واللي يفضلّها جهنم مصيره 

اسعدتنا بورود بوحك وذكراه..
تشفي عليلٍ مبتلش في ضميره

مهدي بن عبار العنزي:
الشعر لولا قيمته ماكتبناه…
وهبه من الله وانظمه ما استعيره 

بحر القصيد افهم طروقه ومعناه…
واحفظ تفاعيله ووجهة مسيره

عصام مطير البلوي:
الشعر لوحه والتشاكيل مهداه..
من خافقٍ ينسج معاني تثيره 

اغرف من بحوره واجيبه من اقصاه..
يشهد على ذلك جموعٍ غفيره

مهدي بن عبار العنزي:
اللي تسلسل من بلي مانسيناه…
يومه على الكفار شن المغيره 

يالله عسى الجنه مقره ومثواه…
تستاهل البيضا وجيهٍ سفيره

عصام مطير البلوي:
الوايلي مثلك حياته وصاياه..
وسيوف ربعه بالمعارك شهيره 

الله يديمك ياجزيلٍ عطاياه..
للي على حبك موثق سريره

اترك ردًا ، شاركنا رأيك ، وانطباعك